دۆلىتىمىزدە ئەيدىز كېسىلى بىلەن يۇقۇملانغان ئەرلەرنىڭ سانى بىر قەدەر كۆپ بولغانلىقتىن كىشىلەرنىڭ كۈچلۈك دىققىتىنى تارتماقتا. ئۇنداقتا، ئەرلەر ئۆزىنىڭ ئەيدىز بولۇپ قالغان، قالمىغانلىقىغا ھۆكۈم قىلىشتا قانداق قىلىشى كېرەك؟ ئەرلەر ئەيدىز كېسىلى بىلەن يۇقۇملانغان دەسلەپكى مەزگىللەردە قانداق ئالامەتلەر كۆرۈلىدۇ؟ 

1. يۇقۇملىنىپ 2 ھەپتىدىن كېيىن:

يېقىندىن بۇيانقى جىنسىي پائالىيەتلىرىڭىزدىن گۇمانلىنىپ قالسىڭىز ھەمدە سىزدە تۆۋەندىكى ئالامەتلەردىن بىرەرسى كۆرۈلسە تېزدىن دوختۇرغا كۆرۈنۈڭ: ئۇدا قىزىش، چارچاش، سەۋەبسىزلا بوغۇز ياللۇغى بولۇپ قېلىش، بەدەن ئېغىرلىقى تۇيۇقسىز %10 تىن ئارتۇق چۈشۈپ كېتىش، باش ئاغرىش، كۆڭۈل ئاينىش، مۇسكۇل ۋە بوغۇملار ئاغرىش، كېچىدە قارا تەرلەش، ئىچى سۈرۈپ توختىماسلىق، ئەسۋە چىقىش. بۇ كېسەللىك ئالامەتلىرى ئەيدىز ۋىرۇسى بىلەن يۇقۇملىنىپ 2 ھەپتىدىن كېيىن كۆرۈلىدۇ.

2. ئەيدىز ۋىرۇسى بىلەن يۇقۇملانغاندىن كېيىنكى جىددىي باسقۇچ:

ئەيدىز ۋىرۇسى بىلەن يۇقۇملانغان بىر قىسىم بىمارلاردا 6 كۈندىن 6 ھەپتىگىچە بولغان ئارىلىقتا قىزىش، لىمغا بەز ئىششىۋېلىش، بوغۇز ياللۇغى، ئەسۋە چىقىش، بوغۇم ياكى مۇسكۇللار ئاغرىش، ئىچى سۈرۈش، باش ئاغرىش، ئېغىرلىقى تۆۋەنلەش قاتارلىق ئالامەتلەر كۆرۈلىدۇ ۋە بۇ ئالامەتلەر ئۇدا 2 ھەپتە داۋاملىشىدۇ. ئادەتتىكى ئەھۋاللاردا ھېچقانداق تەدبىر قوللانمىسىمۇ 2 ھەپتىدىن كېيىن ئۆزلۈكىدىن يوقاپ كېتىدۇ. ئەلۋەتتە، بۇ ئالامەتلەر كۆرۈلگەن كىشىلەرنىڭ ھەممىسى ئەيدىز بىلەن يۇقۇملانغان بولمايدۇ. چۈنكى، باشقا كېسەللەر بىلەن يۇقۇملانغاندىمۇ مۇشۇنداق ئالامەتلەر كۆرۈلىدۇ.

3. ھېچقانداق ئالامەت كۆرۈلمەسلىك:

جىددىي باسقۇچ ئۆتۈپ كەتكەندىن كېيىن، بىمار ھېچقانداق كېسەللىك ئالامىتى كۆرۈلمەسلىك باسقۇچىغا كىرىدۇ. ئاز بىر قىسىم بىمارلاردا «پۈتۈن بەدەن خاراكتېرلىك لىمفا بەز كېسىلى» كۆرۈلگەندىن باشقا كۆرۈنەرلىك ئالامەت كۆرۈلمەيدۇ. چوڭلاردا ئەيدىز ۋىرۇسى بىلەن يۇقۇملانغاندىن كېيىن ھېچقانداق ئالامەت كۆرۈلمەسلىك مۇددىتى ئادەتتە 10-8 يىل بولىدۇ.

4. ئەيدىز كېسىلىنىڭ دەسلەپكى باسقۇچىغا كەلگەندە بىماردا پۈتۈن بەدەن خاراكتېرلىك كېسەللىك ئالامەتلىرى كۆرۈلۈشكە باشلايدۇ. پۈتۈن بەدەن خاراكتېرلىك كېسەللىك ئالامىتى ئادەتتە پۈتۈن بەدەندىكى لىمفا بەزلىرى ئىششىش، چارچاش، ئىشتىھاسى تۇتۇلۇش، قىزىش، بەدەن ئېغىرلىقى تۆۋەنلەش، كېچىدە قارا تەرلەش، قان پلاستىنكىلىرى ئازلاش قاتارلىقلاردىن ئىبارەت. يۇقۇملىنىش يەڭگىل بولغاندا ئېغىر بوشلۇقى ۋە شىللىق پەردە يۇقۇملىنىدۇ، يەنى ئېغىز بوشلۇقىدا تەسۋىسىمان زەمبۇرۇغ پەيدا بولىدۇ، چىش مىلىكى ياللۇغلىنىدۇ، تېرە زەمبۇرۇغ بىلەن يۇقۇملىنىدۇ، بەلۋاغسىمان قوقاق، تۈك خالتىلىق ياللۇغى، قىچىشىش خاراكتېرلىك تېرە ياللۇغى پەيدا بولىدۇ.

5. ئەيدىزنىڭ كېسىلى دەۋرى:

ۋاقىتنىڭ ئۆتۈشىگە ئەگىشىپ ئەيدىز ۋىرۇسىنىڭ ئادەم بەدىنىنىڭ ئىممۇنىتېت سىستېمىسىغا بۇزغۇنچىلىق قىلىش دەرىجىسى بارغانسېرى يۇقىرىلايدۇ. شۇنىڭ بىلەن بىماردا بىر قىسىم خەتەرلىك كېسەللىكلەر، مەسىلەن ئۆپكە ياللۇغى، نەپەس يولى ياللۇغى، لىمفا ئۆسمىسى، ئۆپكە تۇبركليۇز ۋە ئەيدىز بىلەن مۇناسىۋەتلىك باشقا كېسەللىكلەر كۆرۈلۈشكە باشلايدۇ.