خەنزۇچە نامى: 姜

تونۇش: بۇ زەنجىۋىل ئائىلىسىدىكى كۆپ يىللىق سامان غوللۇق ئۆسۈملۈك زەنجىۋىلنىڭ يىلتىزسىمان غولى بولۇپ <زەنجىۋىل> نامىدا دورىغا ئىشلىتىلىدۇ.

تەبىئىتى: ئىككىنچى دەرىجىدە قۇرۇق ئىسسىق.

شىپالىق رولى: نېرۋىلارنى قوزغىتىش، ئىشتىھانى ئېچىش، ھەزىمنى ياخشىلاش، يەل يوقىتىش، جىگەرنىڭ توسالغۇلىرىنى ئېچىش، ئارتۇق ھۆللۈكنى يوقىتىش خۇسۇسىيىتىگە ئىگە.

ئىشلىتىلىدىغان كېسەللىكلەر: نېرۋا ۋە پەي ئاجىزلىقى، پالەچ، لەقۋا، ئىشتىھاسىزلىق، ھەزىم بۇزۇلۇش، قورساق ئېسىلىش، ئاشقازان كىسلاتاسى كۆپىيىپ قېلىش، ئىچ سۈرۈش قاتارلىقلارغا ئىشلىتىلىدۇ.

ئىشلىتىش ئۇسۇلى: بىر گرام زەنجىۋىل سۇفۇپى (تالقىنى) ھەسەل بىلەن قوشۇپ بېرىلىدۇ، تۇخۇمنىڭ سېرىقى بىلەن بېرىلسە، مەنىي سۇيۇلۇپ كېتىش كېسىلىگە پايدا قىلىدۇ. تۇربۇت بىلەن بېرىلسە بۇغۇم ئاغرىقىغا پايدا قىلىدۇ. تارتىشىش، بوۋاسىرنىڭ ئاغرىشى، سوغۇقتىن بولغان ئىششىقلار، ئۇرۇقدان ياللۇغى قاتارلىقلارغا مۇناسىۋەتلىك دورىلار بىلەن ئىككى ئۇرۇقدانغا سۈرۈپ ياغلاشقا بېرىلىدۇ، بۇنى قائىدە بويىچە سوقۇپ بەدەنگە سۈرسە ياكى تالقان قىلىپ يېسە بەدەننىڭ ئىسسىقىنى ساقلايدۇ، بەدەنگە سوغۇق تەگمەيدۇ، ئۇندىن باشقا كۆپلىگەن دورا نۇسخىلىرىغا كىرگۈزۈپ ئىشلىتىلىدۇ.

ئىشلىتىش مىقدارى: 1-2 گرام.

زىيانلىق تەسىرى: گالغا زىيان قىلىدۇ.

تۈزەتكۈچىسى: بادام يېغى ۋە ھەسەل.

ئورۇنباسارى: پىلپىل.

چىقىش ئورنى: بۇ ئېلىمىزنىڭ نۇرغۇنلىغان جايلىرىدىن ھەم گرىتسىيە ۋە ھىندىستان قاتارلىق ئەللەردىن چىقىدۇ.