خەنزۇچە نامى:孜然

تونۇش: بۇ كۈنلۈكسىمان گۈللۈكلەر ئائىلىسىدىكى بىر يىللىق سامان غوللۇق ئۆسۈملۈك زىرىنىڭ قۇرۇتۇلغان پىششىق مېۋىسى بولۇپ، <زىرە> نامىدا دورىغا ئىشلىتىلىدۇ.

تەبىئىتى: ئۈچىنچى دەرىجىدە قۇرۇق ئىسسىق

شىپالىق رولى: ئاشقازاننى قىزىتىش، جىگەر ۋە ئۈچەينى كۈچلەندۈرۈش، يەل تارقىتىش، بۇزۇق ماددىلارنى يوقىتىش، ئارتۇق ھۆللۈكنى قۇرۇتۇش، قاتۇرۇش، سۈيدۈك ۋە ھەيز راۋانلاشتۇرۇش خۇسۇسىيىتىگە ئىگە.

ئىشلىتىلىدىغان كېسەللىكلەر: ھەزىم ئاجىزلىقى، قورساق ئېسىلىش، ھەزىم بۇزۇلۇش، ئىچ سۈرۈش، سۆزنەك، سۈيدۈك تۇتۇلۇش، ھەيز تۇتۇلۇش، جىگەر، ئاشقازان، بۆرەك ئاجىزلىقى، ئىچ سۈرۈش قاتارلىقلارغا ئىشلىتىلىدۇ.

ئىشلىتىش ئۇسۇلى: ھەزىم قىلىشنى كۈچەيتىپ، ئاشقازاننى قىزىتىش مەقسەتلىرىدە تاماققا قوشۇپ ئىستېمال قىلىنىدۇ، قورۇپ ئىستېمال قىلىنسا سۈيدۈك ۋە ھەيزنى راۋان قىلىدۇ، ئەگەر زىرىنى تۇز بىلەن چاينىسا ئاشقازاندىكى ئارتۇق ھۆللۈكنى يوق قىلىدۇ، بۇنىڭ سىركىگە چىلاپ قورۇلغىنى كۈچلۈك قابىز بولۇپ، ئاشقازاننىڭ ھۆللۈكىنى قۇرۇتۇشتا تەسىرى كۈچلۈك، بۇنىڭ قاينىتىلغان سۈيىنى ھۆقنە قىلسا ئۈچەي، ئاشقازان، بۆرەكتىكى يەللەرنى يوق قىلىدۇ. زىرىنى باقىلە ئۇنى بىلەن تاڭسا ئىششىقلارنى تارقىتىدۇ، موم يېغى بىلەن چاپسا ياكى زەيتۇن يېغى بىلەن چاپسا سىرتقى ئىششىقنى ياندۇرىدۇ، تالقانلاپ جفراھەتلەرنىڭ بوشلۇقلىرىغا تولدۇرۇپ قويسا جاراھەتنى پۈتتۈرىدۇ، قايىنىتىپ بەدەننى يۇيۇپ بەرسە بەدەننى پارقىرىتىدۇ، زىرىنىڭ ئۆزىنى ياكى ئۇنىڭ ئەرقىنى داۋاملىق ئىچىپ بەرسە بەدەننى ئورۇقلىتىدۇ، بەلغەم مىزاجلارغا ۋە قېرىلارغا كۆپ پايدىلىق. ئەگەر زىرىنى شىبىت، دارچىن قاتارلىقلار بىلەن قوشۇپ گۆشكە سالسا گۆشنى يۇمشاق پىشۇرىدۇ، گۆشنىڭ تەبىئىتىنى قۇۋۋەتلىك ۋە تەملىك قىلىدۇ، بۇ خىل گۆش سيدۈكنى ھەيدەيدۇ، يەلنى تارقىتىدۇ، ئادەتتە بىر گرام زىرە تالقىنىغا شېكەر قوشۇپ ئىستېمال قىلىنىدۇ.

ئىشلىتىش مىقدارى: 4-6 گرام.

زىيانلىق تەسىرى: ئۆپكىگە زىيان قىلىدۇ.

تۈزەتكچىسى: كەتىرا

ئورۇنباسارى: كەھرىۋا، كاللەكبەسەي ئۇرۇقى

چىقىش ئورنى: شىنجاڭ رايونلىرىدا ئۆستۈرىلىدۇ، ئۇندىن باشقا ئەرەبىستان، ھىندىستان، ئوتتۇرا ئاسىيا، پاكىستان قاتارلىق ئەللەردىمۇ ئۆستۈرىلىدۇ.