خەنزۇچە نامى:三条筋

تونۇش: بۇ كامپۇرا ئائىلىسىدىكى دائىم كۆكىرىپ تۇرىدىغان كىچىك دەرەخ، ئوتۇن قىلىدىغان كامپۇرا دەرىخىنىڭ يوپۇرمىقى بولۇپ، بۇ دەرەخنىڭ قۇرۇتۇلغان يوپۇرمىقى <سازەج ھىندى> نامىدا دورىغا ئىشلىتىلىدۇ.

تەبىئىتى: ئىككىنچى دەرىجىدە قۇرۇق ئىسسىق

شىپالىق رولى: ئاشقازان ۋە مېڭىنى قۇۋۋەتلەش، كۆڭۈلنى خۇشال قىلىش، ئۈچەيدىكى يەللەرنى تارقىتىش، سۈيدۈك ھەيدەش، ھەيزنى راۋانلاشتۇرۇش، چىرىشكە قارشى تۇرۇش، شال ۋە ئېغىزدىكى غەيرىي پۇراقنى يوقىتىش خۇسۇسىيىتىگە ئىگە.

ئىشلىتىلىدىغان كېسەللىكلەر: يۈرەك قوزغىلىش، يۈرەك ئاجىزلىق، ئاشقازان ئاجىزلىقى، جۇنۇن، قورقۇنچاقلىق، ئۈچەيدىكى يەل، ئىستىسقا، يەرقان، تال كېسەللىكلىرى ۋە بارلىق مەقئەت كېسەللىرىگە ئىشلىتىلىدۇ.

ئىشلىتىش ئۇسۇلى: سازەج ھىندىنى يالغۇز ياكى مۇناسىپ دورىلار بىلەن قوشۇپ مۇرەككەپ ياسالما تەييارلاپ يۇقىرىدىكى كېسەللەرگە ئىشلىتىلىدۇ. تىلنىڭ ئاستىغا قويۇپ شۈمىسە ئېغىزدىكى غەيرىي پۇراقنى يوقىتىدۇ. تىلنىڭ كېكەچلىكىنى يوق قىلىدۇ. ئاشقازان ئاغرىقى قوشۇلۇپ كەلگەن ئاغرىقلارغىمۇ پايدا قىلىدۇ، قاپاقنىڭ ئىششىقلىرىنى ياندۇرۇش ئۈچۈن سىركە بىلەن قوشۇپ سۈركۈلىدۇ، قولتۇقنىڭ غەيرىي پۇرىشىنى كەتكۈزۈش ئۈچۈن سازەج ھىندىنى يۇمشاق سوقۇپ تالقان قىلىپ سىركىگە ئېلەشتۈرۈپ سۇيۇقلاندۇرۇپ چېپىلىدۇ.

ئىشلىتىش مىقدارى: 2-4 گرام.

زىيانلىق تەسىرى: ئۆپكە ۋە دوۋساققا زىيان قىلىدۇ.

تۈزەتكۈچىسى: مەستىكى، بېھى شەربىتى.

ئورۇنباسارى: سۇمبۇل

چىقىش ئورنى: ئېلىمىزنىڭ خۇبېي، سىچۈەن، يۈننەن قاتارلىق ئۆلكىلەردىن ھەم كەشمىر، پاكىستان، بېرما قاتارلىق ئەللەردىن چىقىدۇ.