خەنزۇچە نامى:大叶破布木实

تونۇش: بۇ بوتاكۆز ئائىلىسىدىكى ئۆسۈملۈك سەرپىستان دەرىخىنىڭ مېۋىسى بولۇپ <سەرپىستان> نامىدا دورىغا ئىشلىتىلىدۇ. بۇنىڭ مېۋىسى يۈرەك شەكىللىك، ئۇزۇنلۇقى بىر بارماقتىن يېرىم بارماققىچە، سارغۇچ جىگەر رەڭدە كېلىدۇ، پىشقاندا قارا رەڭگە يېقىنلىشىدۇ، قۇرۇتۇلغان رەڭگى قارا بولىدۇ، ئىچىدە ئۇرۇقى بولۇپ، ئۇرۇقى ئېتىگە چاپلىشىپ تۇرىدۇ، بۇنىڭ ئېتى شىرنىلىك، تاتلىق ۋە پارقىراق بولۇپ، بۇنىڭ ئوبدان پىشقان ۋە يېڭى بولغىنى ياخشىسى ھېسابلىنىدۇ.

تەبىئىتى: قۇرۇق سوغۇق.

شىپالىق رولى: كاناي ۋە كۆكرەكنى سىلىقلاشتۇرۇش، بەلغەم بوشىتىش، سەپرا ۋە قاننىڭ ئۆتكۈرلىكىنى پەسەيتىش خۇسۇسىيىتىگە ئىگە.

ئىشلىتىلىدىغان كېسەللىكلەر: يۇتقۇنچاق ۋە كاناي قۇرۇش، نەزلىلىك زۇكام، كۆكرەك ۋە گالنىڭ يىرىكلىكى، سۈيدۈك ئېچىشىپ كېلىش، مەنىي يۈرۈپ كېتىش، قۇرۇق يۆتەل، ئاۋاز پۈتۈپ قېلىش، تولغاق، ئۇسسۇزلۇق قاتارلىقلارغا ئىشلىتىلىدۇ.

ئىشلىتىش ئۇسۇلى: سەرپىستاننى ئېغىزدا تۇتۇپ سۈيىنى يۇتسا 10 گام سەرپىستاننى 125 مىللىلىتىر سۇغا ئاخشىمى چىلاپ قويۇلغان سۈيى ياكى قاينىتىلغان سۈيىنى ئىچسە كۆكرەكنى ۋە كاناينى تازىلايدۇ. كۆكرەك ۋە كانايدىكى ئىششىقلارنى پەسەيتىدۇ، قۇرۇق يۆتەل ۋە ئاۋازنىڭ پۈتۈپ قېلىشىغا پايدا قىلىدۇ، تەشنالىقنى، سەپرانى ۋە سەپرانىڭ ئۆتكۈرلىكىدىن بولغان سۈيدۈكنىڭ كۆيۈپ كېلىشىنى يوقىتىدۇ، ئۈچەيدىكى قۇرتلارنى چىقىرىدۇ، ئىچ سۈرىدىغان دورىلارنى ئىسلاھ قىلىدۇ، سەپرا ۋە قان خاراكتېرلىك قىزىق تەپلەرنى پەسەيتىدۇ، شەربەت قىلىپ ئىچسە ئۈچەيدىكى بەلغەم، ھۆللۈكلەرنى ۋە كۈچلۈك دورا ياكى شاراب ئىچكەن سەۋەبىدىن پەيدا بولغان ئۈچەينىڭ ئېچىشىشى ئۈچۈن پايدا قىلىدۇ.

ئىشلىتىش مىقدارى: 10 گرام.

زىيانلىق تەسىرى: ئاشقازان، جىگەرگە زىيانلىق.

تۈزەتكۈچىسى: چىلان ياكى قىزىلگۈل.

چىقىش ئورنى: ئېلىمىزدىن ۋە ھىندىستان، سىرلانكا، بەھرەيىن قاتارلىق ئەللەردىن چىقىدۇ.