خەنزۇچە نامى:石决明

تونۇش: بۇ مەرۋايىت قۇلۇلىسى ئائىلىسىدىكى ھايۋانات مەرۋايىت، مارتىن ئۈنۈچە قۇلۇلىسى ۋە سەدەپ قۇلۇلىسى قاتارلىق بىرقانچە خىل سەدەپ قۇلۇلىسىنىڭ پوستلاق قاپلىق مەرۋايىت قەۋىتىدىن ئىبارەت بولۇپ، بۇ ئادەتتە <سەدەپ> نامىدا دورىغا ئىشلىتىلىدۇ.

تەبىئىتى: ئىككىنچى دەرىجىدە قۇرۇق سوغۇق

شىپالىق رولى: پەي ۋە نېرىپنى قۇۋۋەتلەش، ئىچ سۈرۈشنى توختىتىش، بەلغەمنى سۈرۈش، سۈيدۈك ھەيدەش، زەھەر قايتۇرۇش، قان توختىتىش قاتارلىق خۇسۇسىيەتلەرگە ئىگە.

ئىشلىتىلىدىغان كېسەللىكلەر: ئىچ سۈرۈش، كۆزنىڭ كۆرۈش قۇۋۋىتى ئاجىزلاش، ئۆپكە سىلى، سىفلىس، قان بۇزۇلۇش، بوغۇم ئاغرىقى، ئولتۇرغۇچ نېرۋا ئاغرىقى، ئۇششاق بوغۇملار ئاغرىقى، ھەيزنىڭ كۆپلۈكى قاتارلىق كېسەللەرگە ئىشلىتىلىدۇ.

ئىشلىتىش ئۇسۇلى: سەدەپ ناھايىتى يۇمشاق سوقۇپ، ئەلگەكتىن ئۆتكۈزۈپ سەپسە ئىچ سۈرۈشنى ۋە ھەرخىل ئەزادىن كەلگەن قاننى توختىتىشقا ئىشلىتىلىدۇ. ئاكىلە (قارايەل-نوما)، سىفلىس جاراھەتلىرىنى ساقايتىدۇ، چىش گۆشلىرىگە باسسا چىشنى چىڭىتىدۇ ۋە چىشنى پارقىرىتىدۇ. بۇرۇننىڭ ئىچىگە قويۇلسا بۇرۇندىن كەلگەن قاننى توختىتىدۇ، قۇرۇقتىن ئاغرىغن كۆزگە تارتسا پايدا قىلىدۇ، يىرىڭنى يوقىتىدۇ، ياۋا كىرپىككە پايدا قىلىدۇ، سىركە بىلەن قوشۇپ سۆگەلگە چاپسا سۆگەلنى چۈشۈرىدۇ، مەقئەتكە سېپىلسە ياكى باسسا بوۋاسىر جاراھەتلىرىگە پايدا قىلىدۇ، كۆيدۈرۈپ ئاق تۇز بىلەن قوشۇپ چىش ئاغرىقىغا باسسا ساقىيىدۇ، چىش مىلىكىنىڭ ھۆللۈكىنى قۇرۇتىدۇ، قاندىن بولغان جاراھەتلەرگە باسسا پايدا قىلىدۇ، تۇخۇمنىڭ ئېقى بىلەن كۆيۈككە چېپىلسا پايدا قىلىدۇ. ئىسسىق سۇ ياكى ئىسسىق ياغ بىلەن مۇناسىۋەتلىك دورىلار بىلەن قوشۇپ چاپسا ئاق داغ ۋە سەپكۈنلەرنى چۈشۈرىدۇ. يۈزىگە چېپىلسا چىرايلىق قىلىدۇ، سىركە بىلەن قوشۇپ قۇلاق ئارقىسىغا چېپىلسا باش ئاغرىقىغا پايدا قىلىدۇ، سۇ بىلەن قوشۇپ چېپىلسا ھۆل سوغۇقتىن بولغان ئاغرىقلارنى پەسەيتىدۇ، ئىچسە يۈرەكنىڭ ئاغرىقىنى پەسەيتىدۇ، كۆيدۈرۈپ بوۋاسىرنى ئىسلىسا پايدا قىلىدۇ، ئىچسە سوغۇقتىن بولغان يەللەرنى تارقىتىدۇ، جۇۋىنە ئەرقى بىلەن خېمىر قىلىپ پاختا بىلەن كىندىكنىڭ تۈۋىگە تاڭسا باھنى قۇۋۋەتلەيدۇ، بۇ ھايۋاننىڭ گۆشىنى شورپا قىلىپ بەرسە قەۋزىيەتنى بوشىتىدۇ، يېغى باشقا چېپىلسا چۈشۈپ كەتكەن چاچنى چىقىرىدۇ.

ئىشلىتىش مىقدارى: كۇشتىسىدىن 250-500 گرام.

زىيانلىق تەسىرى: ئۈستىدىكى قارا پوستىنى قىرىۋەتمەي ئىشلەتسە تالغا زىيان قىلىدۇ.

تۈزەتكۈچىسى: سىركە، ئانار سۈيى، ھەرخىل مېۋە شەربەتلىرى.

ئورۇنباسارى: مەرۋايىت.

چىقىش ئورنى: ئېلىمىزنىڭ دېڭىز بويلىرى رايونلىرىدىن، ئەرەب دېڭىزى بويلىرىدىن ۋە سەيلۇندىن چىقىدۇ.