بۆرەك ئۆزىنىڭ نورمال خىزمىتى ئارقىلىق سۈيدۈك ھاسىل قىلىپ، سۈيدۈك يولى ھەم دوۋساقنىڭ ياردىمىدە ھاياتلىق ئۈچۈن كېرەكسىز ۋە زەھەرلىك ماددىلارنى سۈيدۈك ئارقىلىق بەدەن سىرتىغا چىقىرىپ، بەدەنگە پايدىلىق بولغان خىلىت ۋە ھەرخىل ئوزۇقلۇق ماددىلارنىڭ نىسپىي مۇقىملىقنى ساقلايدۇ ھەم بۆرەك ۋە بۆرەك ئۈستى بېزى قاتارلىقلار بەدەنگە ئېھتىياجلىق مۇھىم ماددىلارنى ھاسىل قىلىپ، ماددا ئالمىشىش پائالىيىتىنىڭ نورمال داۋاملىشىشىغا شارائىت تۇغدۇرۇپ بېرىدۇ، ئەگەر ئوخشىمىغان سەۋەبلەر تۈپەيلىدىن بۆرەكتە بىرەر كېسەللىك يۈز بېرىپ، ئۇنىڭ نورمال خىزمىتىگە تەسىر يەتسە بەدەندىكى ھەرخىل ماددىلارنىڭ نورمال تەڭپۇڭلۇقىغا تەسىر يېتىدۇ-دە، نەتىجىدە بەدەندە تەڭپۇڭلۇق بۇزۇلۇپ جىنسىي ئاجىزلىق پەيدا بولىدۇ.

سەۋەبى: ئىچكى جەھەتتە تەبىئىتى بەك سوغۇق، بەك ئىسسىق ياكى بەك ئاچچىق، بەك تاتلىق، بەك ياغلىق يېمەك-ئىچمەكلەرنى، يەللىك يېمەكلىكلەرنى كۆپلەپ يەپ-ئىچىشكە ئادەتلىنىش ۋە تاماقنى بەك كۆپ يىيىش ياكى ئاچ قېلىش، ناچار ئوزۇقلىنىش قاتارلىقلار.

تاشقى جەھەتتە: ئۇزۇن ۋاقىت ھاۋانىڭ قاتتىق سوغۇق، قاتتىق ئىسسىق، ھۆل قۇرۇق تەسىرىگە ئۇچراش ياكى قاتتىق ئۇرۇلۇش، سوقۇلۇش قاتارلىق سەۋەبلەر تەبىئىي خىلىتلارنىڭ تەڭپۇڭلۇقىنى بۇزۇش بىلەن بۆرەككە تەسىر كۆرسىتىپ جىنسىي ئاجىزلىقنى پەيدا قىلىدۇ.

بۆرەكنىڭ ئۆزىدىكى كېسەللىكلەر ۋە باشقا ئەزالاردىكى كېسەللىكلەر يەنى شېكەر سىيىش (دىئابىت)، بۆرەك ئاغرىقى، تاش ياكى تاغ ئېرىتىدىغان دورا-دەرمەك، يېمەك-ئىچمەكلەرنى ئۇزۇن مۇددەت ئىستېمال قىلىش، جىنسىي مۇناسىۋەتنى كۆپ ئۆتكۈزۈش، كۆپ ئېھتىلام بولۇش قاتارلىقلار سەۋەبىدىن بۆرەكتە ئاجىزلىق يۈز بېرىش، بۆرەك ئۆزىدىكى ياغنى ۋە باشقا تۇتۇپ قېلىشقا تېگىشلىك بەدەنگە پايدىلىق بولغان ھەرخىل ماددىلارنى كۆپلەپ بەدەن سىرتىغا چىقىرىپ تاشلاپ نەتىجىسىدە جىنسىي ئاجىزلىق يۈز بېرىدۇ.

ئالامىتى: جىنسىي قوزغىلىش ئاجىزلايدۇ، بىمار جىنسىي ئاجىزلىقتىن شىكايەت قىلىدۇ. بۆرەك ساھەسىدە، ئىنچىكە بەل، ئېغىزمان، دۈمبىلەردە تېلىش، چىڭقىلىپ ئاغرىش يۈز بېرىدۇ. بىمار ئىگىلگەندە، بەل تولغىغىدا ئاغرىق كۈچىيىدۇ، جىنسىي ئەزا ئۇرۇقدان ساھەسى سوغۇق بولىدۇ. سوغۇق تەرلەيدۇ، سۈيدۈك يولىدا بوشراق ئېچىش بولىدۇ. سۈيدۈكنى ئانالىز قىلىپ تەكشۈرگەندە سۈيدۈك تەركىبىدە ياغ تېپىلىدۇ. كۆپىنچە سۈيدۈك قېتىم سانى كۆپ، مىقدارى ئاز كېلىدۇ، سۈيدۈك تۇتالماسلىق، كۆپ ئېھتىلام بولۇش ئەھۋاللىرى كۆرۈلىدۇ. مەنىي سۇيۇق كېلىدۇ. ئىشتىھاسى كەم، بەدىنى ئورۇق، ماغدۇرسىز بولىدۇ. داۋاملىق ھارغىنلىق ھېس قىلىدۇ. كۆزى تورلىشىپ قاراڭغۇلىشىدۇ، بېشى ئاغرىيدۇ، ئۇيقۇسى ياخشى بولمايدۇ، زېھنى كۈچ ئاجىزلاپ ئۇنتۇغاقلىق يۈز بېرىدۇ.

داۋالاش: دەسلەپ سەۋەبىگە قارىتا چارە قىلىش، ئاندىن كېيىن بۆرەكنى كۈچلەندۈرۈش ئۈچۈن بىر قىسىم قۇۋۋەتلىگۈچى غىزالارنى يەپ بېرىش، بۇنىڭ ئۈچۈن قۇشقاچ، كەكلىك، قوتاز گۆشلىرىدە شورپا قىلىپ ئىچىش، تەنتەربىيە ھەرىكەتلىرى بىلەن شوغۇللىنىش، كۆڭلىنى خۇش تۇتۇش، ھاۋاسى ساپ يەرلەرنى ساياھەت قىلدۇرۇش، روھىي جەھەتتىن ئۆزىنى خوشال تۇتۇش كېرەك.