خەنزۇچە نامى: 海马

تونۇش: بۇ بىر خىل <تىمساق> دېگەن سۇ ھايۋىنىنىڭ نەسلىدىن كېلىپ چىققان ھايۋان بولۇپ، ئۆچكىنىڭ بالىسىغا ئوخشايدۇ، سۇنىڭ ئىچىدىن قۇرۇقلۇققا چىقىپ تۇغىدۇ، بالىسى قۇرۇقلۇقتا ئۆسۈپ چوڭ بولىدۇ، ئۇششاق بېلىق ۋە جاڭگالنىڭ ئۇششاق ھايۋانلىرى بىلەن ئوزۇقلىنىدۇ، چوڭ بولغاندا سۇنىڭ ئىچىگە كىرىۋالىدۇ، سۇنىڭ ئىچىدە لەھەڭ بولىدۇ، قۇرۇقلۇقتا قالغىنى سەقەنقۇر بولىدۇ، بۇنىڭ بېشى ئىنچىكە، رەڭگى سېرىق، ئاق كۈل رەڭگە مايىل، تېرىسى سىلىق، قورسىقى ۋە بېلىنىڭ ھەممە يېرى قوزىنىڭكىگە ئوخشاش. ئەركىكىنىڭ خورازنىڭكىگە ئوخشاش ئەرلىك جىنسىي ئورگىنى ھەم ئۇرۇقدىنى بولىدۇ، چىشىسىنىڭ جىنسىي ئەزاسى ئىككى بولۇپ، ئىككىلىسىدىن تۇخۇم تۇغىدۇ، تۇخۇمى 20 دانىدىن ئوشۇق. تۇخۇمىنى قۇمغا ئوبدان كۆمۈپ قويىدۇ، كۈن نۇرى تەسىرىدىن تۇخۇم قىزىپ ئىچىدىن چۈجىسى چىقىدۇ، قىش ۋە سوغۇق پەسىللەردە قۇرۇقلۇققا چىقىۋالىدۇ، شۇنداق چاغلاردا تۇتماق ئاسان، تۇتقان چاغدىلا ئۆلتۈرمىسە قۇۋۋىتى كېتىپ قالىدۇ، تۇتقاندىن كېيىن سايىدا قۇرۇتۇپ ئىشلىتىدۇ، بۇ خىل سۇ ھايۋىنىنىڭ قۇرۇتۇلغان پۈتۈن تېنى <ئەركەك بېلىق> ياكى <سەقەنقۇر> نامىدا دورىغا ئىشلىتىلىدۇ.

تەبىئىتى؛ بۇنىڭ يېڭىسى ۋە تۇزلىمىغىنى ئىككىنچى دەرىجىسە قۇرۇق ئىسسىق. كونىسى ئۈچىنچى دەرىجىدە قۇرۇق ئىسسىق.

شىپالىق رولى: پەيلەرنى قۇۋۋەتلەش، ئاغرىق پەسەيتىش، جىنسىي ئالاقىنى قۇۋۋەتلەش، سۈيدۈك ھەيدەش، جىنسىي ئىنتىلىشنى كۈچەيتىش، بەدەننى كۈچلەندۈرۈش خۇسۇسىيىتىگە ئىگە.

ئىشلىتىلىدىغان كېسەللىكلەر: پالەچ، لەقۋا، تىترىمە كېسەل، جىنسىي قابىلىيىتى تۆۋەنلەپ كېتىش، چوڭ-كىچىك بوغۇم ئاغرىقى قاتارلىق كېسەللىكلەرگە ئىشلىتىلىدۇ.

ئىشلىتىش ئۇسۇلى: سەقەنقۇرنىڭ گۆشىنى يېسە يۇقىرىقى كېسەللەرگە پايدا قىلىدۇ ھەم جىنسىي ئالاقىنى قۇۋۋەتلەيدۇ، مەنىي يوللىرىدا مەنىي چىقالماي قالغانلارغا (خۇسۇسەن ھەسەل ۋە ئەدەس بىلەن قاينىتىپ ياكى ئۈزۈم شەربىتى بىلەن ئىلىتىلغان تۇخۇم سېرىقى ۋە جۇلاب بىلەن بېرىلسە توختاپ قالغان مەنىينى چىقىرىدۇ) پايدا قىلىدۇ، سەقەنقۇرنىڭ بېشىنى، يېغىنى، تۇزىنى دارچىن بىلەن يۇمشاق سوقۇپ، ئىللىتىلغان تۇخۇم سېرىقى بىلەن قوشۇپ ئىچسە، جىنسىي ئالاقىنى قۇۋۋەتلەشتە ئوبدان ئۈنۈم بېرىدۇ، بۇنىڭ قېنىنى ھېلىلە، ئامىلە بىلەن قوشۇپ يېسە ئاقكېسەلگە ئوبدان پايدا قىلىدۇ ۋە ئاق ئورۇننىڭ رەڭگىنى ئۆزگەرتىدۇ، بۇنىڭدىن بىر جۈپ تۇتۇپ ئوتتا قۇرۇتۇپ تالقانلاپ ھەر كۈنى ئۈچ قېتىم، ھەر قېتىمدا بىر گرامدىن ئىسىتىلغان ھاراق بىلەن ئىچىپ بېرىلسە ئەرلەرنىڭ جىنسىي قۇۋۋىتىنى زىيادە قىلىدۇ، تۇغماس ئاياللار قورساق كۆتۈرۈپ تۇغۇشقا يادەم بېرىدۇ.

ئىشلىتىش مىقدارى: 4-15 گرام.

ئورۇنباسارى: سەمەكى سەيدا، قۇم بېلىقى، تاغ بۇقىسىنىڭ قۇرۇتۇلغان ئالىتى.

چىقىش ئورنى: ئېلىمىزنىڭ دېڭىز بويلىرى رايونلىرىدىن، شۇنىڭدەك مىسىر، ھىندىستان ۋە ھەبەشىستان قاتارلىق ئەللەردىن چىقىدۇ.