خەنزۇچە نامى:芸香

تونۇش: بۇ سۇزاپ ئائىلىسىدىكى كۆپ يىللىق سامان غوللۇق ئۆسۈملۈك سۇزاپ بولۇپ، ئۇنىڭ پۈتۈن چۆپى <سۇزاپ>، ئۇنىڭ ئۇرۇقى <تۇخۇمى سۇزاپ> نامىدا دورىغا ئىشلىتىلىدۇ بۇ ئۆسۈملۈكنىڭ ئېگىزلىكى بىر مېتىرغا يېتىدۇ، ناھايىتى پۇراقلىق كېلىدۇ، پۈتۈن كۆچىتى تۈكسىز، يوپۇرمىقى ئۇششاق ۋە يۇمىلاق، ئۇزۇنلۇقى 5-15 سانتىمېتىر، كۈنلۈكسىمان گۈل تىزمىسى ئەڭ ئۇچىدا ياكى قولتۇقىدا ئۆسىدۇ، گۈلىنىڭ رەڭگى سېرىق، ئۇرۇقى 4-5 دانە بولۇپ پىشقاندا يېرىلىدۇ.

تەبىئىتى: ئۈچىنچى دەرىجىدە قۇرۇق ئىسسىق.

شىپالىق رولى: مېڭىنى قۇۋۋەتلەش، ئەقىلنى زىيادە قىلىش، يەل تارقىتىش، توسالغۇلارنى ئېچىش، قۇرۇتۇش، تۇتۇش، زەھەر قايتۇرۇش، تېرىنى غىدىقلاش، قىزارتىش، ئاغرىق پەسەيتىش، سۈيدۈك ۋە ھەيزنى راۋانلاشتۇرۇش خۇسۇسىيىتىگە ئىگە.

ئىشلىتىلىدىغان كېسەللىكلەر: قۇلاق ئاغرىقى، ئاشقازان ئاجىزلىقى، جىگەر قېتىش، ئىشتىھاسىزلىق، قورساق ئېسىلىش، بەھەق، بەرەس، تەمرەتكە، مېڭە ۋە پەي كېسەللىكلىرى، پالەچ، تارتىشىش، بوغۇم ئاغرىقلىرى قاتارلىقلارغا ئىشلىتىلىدۇ.

ئىشلىتىش ئۇسۇلى: سۇزاپ يوپۇرمىقى سۇفۇپىدىن 3-4 گرامنى ئەتىگەن ۋە كەچتە يېيىلىدۇ ھەم قاينىتىلغان سۈيىگە ھەسەل قوشۇپ بېرىلىدۇ، سېرىقچېچەك بىلەن بېرىلسە ھېق تۇتۇشنى توختىتىدۇ، زەيتۇن يېغى بىلەن قاينىتىپ ئۈستىدىن ياغلىسا بوغۇم ئاغرىقى، يانپاش ئاغرىقى، بەزگەك، تەپ ۋە سۇلۇق ئىششىقلار ئۈچۈن پايدا قىلىدۇ، ئاشقازاندىكى قۇرتنى چىقىرىش ئۈچۈن شاراب بىلەن يېرىمى قالغۇچە قاينىتىپ بېرىلىدۇ. ئايال كىشى بۇنى ئىچسە ياكى ھەمەل قىلسا ھەيز ماڭدۇرىدۇ، قويۇق خىلىتلارنى تارقىتىدۇ، سۇزاپ بەدەننى زەھەرلىنىشتىن ساقلايدۇ، ھۆللۈكنى قۇرۇتىدۇ، يىلان، چايان چاققان، ئىت چىشلىگەن جايغا سۈركىسە پايدا قىلىدۇ.

ئىشلىتىش مىقدارى: 3-5 گرام.

زىيانلىق تەسىرى: ياشنى ئاغرىتىدۇ، كۆزگە زىيانلىق.

تۈزەتكۈچىسى: رۇم بەدىيان، سىركەنجىۋىل.

ئورۇنباسارى: سەئتەر، پىننە.

چىقىش ئورنى: ئېلىمىزنىڭ جەنۇبىي قىسم رايونلىرى، شىنجاڭنىڭ تاغلىرى ۋە باغلىرى، ھىندىستان، پاكىستان قاتارلىق ئەللەردىن چىقىدۇ.