خەنزۇچە نامى:甘松

تونۇش: بۇ سۇمبۇل ئائىلىسىدىكى كۆپ يىللىق سامان غوللۇق، ئېگىزلىكى 25-35 سانتېمىتىر ئۆسىدىغان ئۆسۈملۈك جۇڭگو سۇمبۇلى بولۇپ، بۇ ئۆسۈملۈكنىڭ غولى ۋە يىلتىزى <سۇمبۇل چىنى> نامىدا دورىغا ئىشلىتىلىدۇ. ھازىر رايونىمىزدا ئىشلىتىلىۋاتقان سۇمبۇل مۇشۇنىڭدىن ئىبارەت. بۇنىڭ گۈلى ۋە ئۇرۇقى بولمايدۇ. رەڭگى قارا سېرىققا مايىل، خۇشبۇي، ئۆتكۈر پۇراقلىق، يىلتىزى بىر ئاز قاتتىق.

تەبىئىتى: قۇرۇق ئىسسىق.

شىپالىق رولى: مېڭە، ئاشقازان، جىگەر، يۈرەكنى قۇۋۋەتلەش، چىش ۋە رەڭگىرويىنى چىرايلىق قىلىش، قورۇش، تۇتۇش، سۈيدۈك ۋە ھەيزنى راۋانلاشتۇرۇش، مېڭە، كۆكرەك ۋە تىلدىكى ھۆللۈكلەرنى قۇرۇتۇش، ئاشقازان بىلەن ئۈچەيگە ماددىلارنىڭ قويۇلىشىنى توسۇش، تاش پارچىلاش، ئېغىزنى خۇشبۇي قىلىش قاتارلىق خۇسۇسىيەتلەرگە ئىگە.

ئىشلىتىلىدىغان كېسەللىكلەر: يۈرەك، نېرۋا، ئاشقازان، جىگەر ئاجىزلىقى، ئىشتىھاسىزلىق، يۇقىرى قان بېسىم، قورساققا سۇ چۈشۈش، سۈيدۈك توسۇلۇش، ھۈمىدەش، يۈرەك رېتىمى قالايمىقانلىشىش، ھەيز توسۇلۇش، كۆپ تەرلەش قاتارلىقلارغا ئىشلىتىلىدۇ.

ئىشلىتىش ئۇسۇلى: سۇمبۇلنى ئەمەن ۋە سەندەل بىلەن بىرگە ئىشلەتسە ئىشتىھانى ئاچىدۇ، ئاشقازاننى قۇۋۋەتلەيدۇ، بەدەنگە سۈركىسە خۇشبۇي قىلىدۇ. قاينىتىپ سۈيىدە ئولتۇرسا بۆرەك، بالىياتقۇ ئاغرىقى ۋە ئىششىقى ئۈچۈن پايدا قىلىدۇ. ھەيزنى راۋانلاشتۇرىدۇ ۋە مۇرەككەپ دورىلار تەركىبىگە كىرگۈزىلىدۇ، سۇمبۇلنى كۆپىنچە سۇمبۇل ھىندىنىڭ ئورۇنباسارى تەرىقىسىدە ئىشلىتىلىدۇ. يۇمغاقسۈت بىلەن كۆزگە تارتسا كۆزدىكى قىزىللىقنى كۆتۈرىدۇ ۋە كۆزنى قۇۋۋەتلەيدۇ. كىرپىك ئۆستۈرىدۇ، دورىلارنىڭ قۇۋۋىتىنى كۆز قاتلاملىرىغا يەتكۈزۈپ ھۆللۈكلەرنى قۇرۇتىدۇ. موزا بىلەن كۆزگە تارتسا ياشنى توختىتىدۇ. خېمىرنىڭ ئىچىدە پىشۇرۇپ چېپىلسا جاراھەتنى پۈتتۈرىدۇ. لاتىغا سۈرۈپ پەرجىگە كىرگۈزسە بالىياتقۇدىن كېلىدىغان قان ھۆللۈكلەرنى توختىتىدۇ. سۇمبۇلدىن 500 گرامنى 700 گرام ئۈزۈم سۈيىدە قاينىتىپ يېرىمى قالغاندا ئېلىپ ئۈچ ھەپتە ئاپتاپتا قويۇپ قويسا قويۇلىدۇ. يۇقىرىقىغا قارىغاندا قۇۋۋىتى تېخىمۇ يۇقىرى بولىدۇ.

ئىشلىتىش مىقدارى: 3-5 گرام.

چىقىش ئورنى: ئېلىمىزنىڭ سىچۈەن، گەنسۇ، چىڭخەي ئۆلكىلىرى ۋە شىنجاڭدىن چىقىدۇ.