مىنېرال ماددىلار ئورگانىزم توقۇلمىلىرىنى تەشكىل قىلىدىغان مۇھىم ماتېرىيال، ھۈجەيرە ئىچكى، سىرتقى سۇيۇقلۇقىنىڭ مۇھىم تەركىبىي بولۇپ، سۇيۇقلۇقنىڭ مۇئەييەن ئوسموتىك بېسىمىنى ۋە بەدەن سۇيۇقلۇقىنىڭ كىسلاتا-ئىشقارلىق تەڭپۇڭلۇقىنى نېرۋا، مۇسكۇللارنىڭ قوزغىلىشچانلىقىنى ساقلايدىغان ئورگانىزمدىكى ئالاھىدە فىزىئولوگىيىلىك ئىقتىدارغا ئىگە ماددىلارنىڭ مۇھىم تەركىبى، نۇرغۇن ئېنزم سىستېمىلىرىنى ئاكتىپلاشتۇرغۇچى ماددا، ياردەمچى فاكتور ياكى تەشكىل قىلغۇچى تەركىبتىن ئىبارەت. 

بەزى مىنېرال ماددىلارنىڭ يەنە راكنىڭ ئالدىنى ئېلىش، ئىممونىتېت سىستېمىسىنى كۈچەيتىش رولى بار. مەسىلەن، كالتسىي بىلەن فوسفور سۆڭەكنى تەشكىل قىلىدىغان تەركىبتىن ئىبارەت، كالىي بىلەن ناترىي ئادەم بەدىنىنىڭ ئوسموتىك بېسىمىنى ساقلايدۇ، سىنك، مىس، مانگان، قاتارلىقلار نۇرغۇن ئېنزىملارنىڭ ئاكتىپلىقى بىلەن مۇناسىۋەتلىك، يود بولسا قالقانسىمان بەز ھورمۇننىڭ تەركىبىي قىسمى، كوبالت بولسا ۋىتامىن B12 نىڭ تەركىبىي قىسمى، ۋەھاكازالار. 

مىنېرال ماددىلار ئومۇمىي جەھەتتە يەنە ئادەم بەدىنىنىڭ كىسلاتا، ئىشقارلىق تەڭپۇڭلۇقىنى ساقلاشتىن ئىبارەت مۇھىم رولنى ئويناپ، ئادەم بەدىنىدىكى قاننىڭ PH قىممىتىنى 7.25-7.65 دائىرىسىدە تىزگىنلەيدۇ، مۇشۇ دائىرىدىن ئېشىپ كەتسە ياكى بۇنىڭدىن تۆۋەنلەپ كەتسە، ئادەم كېسەلگە مۇپتىلا بولىدۇ، ئېغىر بولغاندا ھەتتا ھاياتىغا خەۋپ يېتىدۇ. 

ئورگانىزم ھەر كۈنى بەلگىلىك مىقداردا مىنېرال ماددا سەرپ قىلىدىغانلىقى ياكى زىيانغا ئۇچرىتىدىغانلىقى ئۈچۈن، ئادەم بەدىنى ھەرخىل يېمەكلىكلەردىن يېتەرلىك مىقداردىكى مىنېرال ماددىلارغا ئېرىشكەندىلا، ئاندىن ياخشى ساغلام ھالىتىنى ساقلاپ تۇرالايدۇ. ئادەتتىكى ئەھۋالدا، يېمەكلىكنى كۆپ خىللاشتۇرسىلا، كىشىلەر يېمەكلىكلەردىن يېتەرلىك مىقداردىكى مىنېرال ماددىلارغا ئېرىشەلەيدۇ، مىنېرال ماددا يېتىشمەسلىك ئەھۋالى كېلىپ چىقمايدۇ. 

مىنېرال ماددىلارنىڭ ئادەم بەدىنىگە نىسبەتەن بىر بىخەتەر ۋە مۇۋاپىق قوبۇل قىلىنىش دائىرىسى بولىدۇ، مۇشۇ دائىرىنىڭ سىرتىدا بولسا، ئورگانىزمغا پايدىسىز تەسىرلەرنى كۆرسىتىدۇ. قوبۇل قىلىنىش مىقدارى يېتەرلىك بولمىسا، مىنېرال ماددا يېتىشمەسلىك ئالامەتلىرى كۆرۈلىدۇ، ئەمما زىيادە كۆپ قوبۇل قىلىنسا زەھەرلىنىشنى كەلتۈرۈپ چىقىرىدۇ، بولۇپمۇ بەزى مىكرو ئېلېمېنتلارنىڭ ئېھتىياجلىق مىقدارى بىلەن زەھەرلىنىشنى كەلتۈرۈپ چىقرىش مىقدارى ئوتتۇرىسىدىكى دائىرە ئىنتايىن كىچىك، شۇڭا ئۇلارنىڭ قوبۇل قىلىنىش مىقدارىغا تېخىمۇ دىققەت قىلىش كېرەك.