يازلىق بەسەي (小白菜) يەنە كۆك يازلىق بەسەي، مايلىق بەسەي (油菜) دەپمۇ ئاتىلىدۇ، ئۇ ئەسلىي ئېلىمىزدىن چىقىدىغان، ئاممىنىڭ قىزغىن ياقتۇرۇشىغا ئېرىشكەن، ئىستېمال مىقدارى ئەڭ يۇقىرى كۆكتاتلارنىڭ بىرى. 

يازلىق بەسەي سوغۇقنى ۋە سالقىننى خالايدۇ ھەم تۆۋەن تېمپېراتۇرىغىمۇ، يۇقىرى تېمېراتۇررىغىمۇ چىداملىق بولۇپ، يىلنىڭ بېشىدىن ئاخىرىغىچە تېرىپ ئۆستۈرگىلى ۋە بازارغا سالغىلى بولىدۇ. ئەمما تېتىملىقلىقى، بىخەتەرلىكلىكى ۋە ئۇزۇقلۇق رولىدىن قارىغاندا، 1-،2-،3-ئاي بولسا يازلىق بەسەينى ئىستېمال قىلىشنىڭ ئەڭ ياخشى پەسلى ھېسابلىنىدۇ.

قىش پەسلىدە ھاۋا تېمپېراتۇرىسى بىر قەدەر تۆۋەن بولىدۇ، يازلىق بەسەي تەركىبىدىكى كاربون سۇ بېرىكمىلىرى شېكەرگە ئۆزگىرىدۇ، ياغ مىقدارى كۆپىيىپ، ئېرىشچان ئاقسىل، تويۇنمىغان ياغ كىسلاتاسى، فوسفورلۇق ياغ (فوسفاتىد) مىقدارى ئېشىپ، بۇ ئارقىلىق يازلىق بەسەينىڭ سوغۇققا چىداملىقلىقى يۇقىرى كۆتۈرۈلىدۇ. ئىستېمالچىلارغا نىسبەتەن ئېيتقاندا، ئۇ ئزۇقلۇققا تېخىمۇ باي بولۇپ، يېگەندە يۇمشاق ھەم مەززىلىك، خۇش پۇراقلىق ۋە يېڭى، تەمى تاتلىق بىلىنىدۇ.

ئوزۇقلۇق تەركىبى ۋە رولى

يازلىق بەسەي تەركىبىدە ۋىتامىن C، تويۇنمىغان ياغ كىسلاتاسى ۋە كالتسىي، فوسفور، تۆمۈر قاتارلىق مىنېرال ماددىلار بار.

يازلىق بەسەي كۆكتاتلار ئارىسىدىكى ۋىتامىن، مىنېرال ماددا ئەڭ مول كۆكتات بولۇپ، ئۇنىڭ تەركىبىدىكى ۋىتامىن C، نىڭ مىقدارى بەسەينىڭكىدىن ئۈچ ھەسسىدىن ئارتۇق كۆپ، كالتسىي مىقدارى بەسەينىڭكىدىن ئىككى ھەسسە كۆپ.

يازلىق بەسەي سۆڭەكنىڭ يېتىلىشىنى ئىلگىرى سۈرىدۇ، ئادەم بەدىنىنىڭ ماددا ئالماشتۇرۇشىنى تېزلىتىدۇ ۋە ئورگانىزىمنىڭ قان ئىشلەش ئىقتىدارىنى كۈچەيتىدۇ. يازلىق بەسەي روھىي جىددىيلىكنى پەسەيتىدۇ، ئىمتىھانغا قاتنىشىشتىن ئىلگىرى يازلىق بەسەينى كۆپرەك ئىستېمال قىلغاندا، تىنچ روھىي ھالەتنى ساقلاشقا ياردىمى بولىدۇ.  

يازلىق بەسەي يۈرەك قان تومۇر كېسەللىكلىرىنىڭ ئالدىنى ئېلىشقا پايدىلىق، راك كېسىلىگە گىرىپتار بولۇش خەۋپىنى ئازايتىدۇ ھەمدە ئۈچەي-ئاشقازاننى راۋانلاشتۇرىدۇ، ئۈچەينىڭ لۆمۈلدىشىنى ئىلگىرى سۈرۈپ، چوڭ تەرەتنىڭ راۋانلىقىنى ساقلايدۇ.

يازلىق بەسەي يەنە تالنى ساسغلاملاشتۇرۇپ، سۈيدۈكنى ھەيدەيدۇ، سۈمۈرۈلۈشنى ئىلگىرى سۈرىدۇ، ئۇنىڭ ئۈستىگە يەلتاشمىنىڭ يېنىشىغا ياردەم بېرىدۇ.

ئىستېمال قىلىشتا بىلىۋېلىشقا تېگىشلىك ئىشلار

يازلىق بەسەي شورپىسى ئورۇقلاشقا پايدىلىق.

يازلىق بەسەي خام ئىستېمال قىلىشقا مۇۋاپىق كەلمەيدۇ، تال-ئاشقازىنىنى سوغۇق قاپلاپ كەتكەنلەر، چوڭ تەرىتى سۇيۇق كېلىدىغانلار يازلىق بەسەينى كۆپ ئىستېمال قىلماسلىقى لازىم.

ئوزۇقلۇقنىڭ زىيانغا ئۇچرىشىدىن ساقلىنىش ئۈچۈن، يازلىق بەسەينى قورۇش، داغلاش ۋاقتى بەك ئۇزۇن بولماسلىقى لازىم.

يازلىق بەسەينى ئورىغاندىن كېيىن ئاران 2~3 كۈنن سوغۇق ساقلىغىلى بولىدۇ، ئەگەر يىلتىزى بىلەن بىللە ساقلىغاندا، ساقلاش ۋاقتىنى 1~2 كۈن ئۇزارتقىلى بولىدۇ.