ھەركۈنى تۇخۇم يىسە قان قەنتى تۆۋەنلەيدىكەن - شىنجاڭ ساغلاملىق تورى ۋاكالەتچىلەر نۇسخىسى

تۇخۇم قان قەنتىگە پايدىسىزمۇ؟ بۇنىڭ جاۋابى دەل ئەكسىچە بولۇپ، تۇخۇمنى كۆپ يېيىش قان قەنتى سەۋىيەسىنى كونتىرول قىلىشقا پايدىلىق. شۇنىڭدەك يەنە بەزى تەتقىقاتلاردا كۆرسىتىلىشىچە، تۇخۇم دىيابىت كېسىلى بىمارلىرىنىڭ بەدەن ئېغىرلىقىنى يېنىكلىتىپ، قان بېسىمىنى تۆۋەنلىتىشكە ياردىمى بار ئىكەن.
2017-يىلىدىكى ئىستاتىستىكا سانلىق مەلۇماتلىرىدىن كۆرسىتىلىشىچە، دۆلىتىمىزدىكى دىيابېت كېسىلى بىمارلىرىنىڭ سانى بىر مىليونغا يېقىنلاشقان، لېكىن بۈگۈنكى كۈندە كۆپلىگەن ناچار يېمەك-ئىچمەك ئادىتى بىلەن تۇرمۇش ئۇسۇلى كېسەللىك ئەھۋالىنى تېخىمۇ ئېغىرلاشتۇرۇۋاتىدۇ. شۇڭا، دىيابېت كېسەللىكى بىمارلىرى كۈندىلىك ئوزۇقلۇقىدا ئىككى دانە تۇخۇم يېيىشنى داۋاملاشتۇرسا، يېمەك-ئىچمەك تەڭپۇڭلىشىش بىلەن بىرگە، يەنە قان قەنتى سەۋىيەسىنى كونتىرول قىلىش ۋە قان بېسىمنى تۆۋەنلىتىش رولىغا ئىگە بولىدىكەن.
تۇخۇمدىكى ئاقسىل مول، شۇنىڭدەك ياغ مىقدارى ۋە كاربون سۇ بىرىكمىسىنىڭ مىقدارىمۇ بىر قەدەر تۆۋەن، بەدەن ساغلاملىقىغا ئىنتايىن پايدىلىق بولغاچقا، تەبىئىي يېمەكلىك ھېسابلىنىدۇ. بىراق كۆپلىگەن دىيابېت كېسىلى بىمارلىرى تۇخۇم يېيىشتىن ئۆزىنى چەتكە ئالىدۇ، چۈنكى كۆپلىگەن كىشىلەر تۇخۇمدىكى خولېستىرىننىڭ مىقدارى زىيادە كۆپ، كېسەللىك ئەھۋالىنى كونتىرول قىلىشقا پايدىسىز، دەپ قارايدۇ.
بىراق ئەمەلىيەتتە كۆپىنچە كىشىلەرگە نىسبەتەن ئېيتقاندا، تەركىبىدە خولېستىرىن مىقدارى بار يېمەكلىكلەر كېسەللىك قوزغاتمايدۇ. بەدەن ساغلاملىقىغا ھەقىقىي زىيانكەشلىك قىلىدىغىنى تويۇنغان ياغ كىسلاتاسى بولۇپ، ئەگەر ھەددىدىن زىيادە يۇقىرى ئېنىرگىيەلىك يېمەك ئىچمەك قوبۇل قىلىنىپ، چېنىقىش كەمچىل بولغاندا دىيابېت كېسىلى، يۇقىرى قان بېسىم قاتارلىق بىر قاتار كېسەللىكلەرنىڭ قوزغىلىش ئېھتىماللىقى يۇقىرى بولىدۇ.
ئىنسۇلىننىڭ رولى بولسا ئادەم بەدىنىدىكى قاننىڭ گلوكوزا مىقدارىنى كونتىرول قىلىشتىن ئىبارەت. ئەگەر ئاشقازان ئاستى بېزى يېتەرلىك ئىنسۇلىن ئاجرىتىشقا ئامالسىز قالغاندا ياكى ئادەم بەدىنى ئىنسۇلىنغا نىسبەتەن ھېچقانداق ئىنكاس قايتۇرمىغاندا دىيابېت كېسىلى قوزغىلىدۇ.
2 تىپلىق دىيابېت كېسىلى بىمارلىرىدا دائىم ئۇچرايدىغان كېسەللىك ئالامەتلىرى ئېغىز قۇرغاقلىشىش، باش ئاغرىش، كۆپ سىيىش، چارچاپ ماغدۇرسىزلىنىش ھەمدە كۆز ئالدى غۇۋالىشىش قاتارلىقلارنى ئۆز ئىچىگە ئالىدۇ. شۇنىڭدەك، بەدەن ئېغىرلىقى نورمال دائىرىدىن ئېشىپ كېتىدۇ، يېشى 40تىن ئاشقان ياكى جەمەتىدە كېسەللىك تارىخىي بار كىشىلەر ئاسانلا 2 تىپلىق دىيابېت كېسىلىگە گىرىپتار بولىدۇ. بۇنىڭدىن شۇنى كۆرۈۋېلىشقا بولىدۇكى، دىيابېت كېسىلىنىڭ خەۋىپى چوڭ، كېسەلگە گىرىپتار بولۇش خەتىرىمۇ بىر قەدەر يۇقىرى بولىدۇ. شۇڭا يېمەك-ئىچمەك ۋە تۇرمۇش ئادىتىدە مەزكۇر كېسەلنىڭ ئالدىنى ئېلىشى ۋە كونتىرول قىلىشقا دىققەت قىلىش كېرەك.
تۇخۇم دىيابېت كېسىلى بىمارلىرىنىڭ كېسەللىك ئەھۋالىنى ياخشىلاشتىن سىرت، يەنە كۆپلىگەن ئۈنۈمگە ئىگە. مەسىلەن، يۈرەك كېسەللىكى، كۆز گۆھىرىگە ئاق چۈشۈش كېسەللىكى، شۇنداقلا كۆرۈش تور پەردىسىگە سېرىق داغ چۈشۈش كېسەللىكى قاتارلىقلارنىڭ خەۋىپىنى تۆۋەنلىتىدۇ. بۇنىڭدىن سىرت، تۇخۇمدا خولىن مول بولغانلىقتىن، داۋاملىق ئىستىمال قىلغاندا جىگەر ئىقتىدارىنى ياخشىلاشقا ياردىمى بار. تۇخۇمدا يەنە تېرە راكىنىڭ ئالدىنى ئالىدىغان ۋە قارشى تۇرىدىغان كۆپ خىل ئوزۇقلۇق ماددىلار بار.
شۇڭا، مەيلى دىيابېت كېسىلىگە گىرىپتار بولۇڭ ياكى بولماڭ، ھەر كۈنى ئىككى دانە تۇخۇم يېيىشنى سىناپ كۆرسىڭىز بولىدۇ.

ئەڭ يېڭى ساغلاملىق مەھسۇلاتلىرى