تاماكا چىكىش تۆۋەندىكىدەك ئېغىر ئاقىۋەتلەرنى كەلتۈرۈپ چىقىرىدۇ - شىنجاڭ ساغلاملىق تورى ۋاكالەتچىلەر نۇسخىسى

تاماكا چېكىش سالامەتلىككە پايدىسىز بولۇپ، ئىزچىل تۈردە كىشىلەرنىڭ قىزىق نۇقتىسىغا ئايلانماقتا. كۆپلىگەن تەتقىقات، خەۋەرلەردە تاماكا چېكىشنىڭ ئادەم بەدىنىگە خەۋىپ پەيدا قىلىدىغانلىقى ئېيتىلسىمۇ، بىراق يەنىلا تاماكا خۇمارلىرىنىڭ ئىشتىياقىنى توسۇپ قالغىلى بولمايدۇ.
مۇناسىۋەتلىك تەكشۈرۈشلەردىن كۆرسىتىلىشىچە، 2015-يىلى پۈتۈن دۇنيادىكى تاماكا چەككۈچىلەرنىڭ سانى 933 مىليوندىن ئاشقان. لېكىن بۇلتۇر، يەنى 2017-يىلى خەۋەر قىلىشىچە، پۈتۈن دۇنيادىكى تاماكا چەككۈچىلەرنىڭ سانى بىر مىلياردتىن ئاشقان. بەزىلەر ئون يىل ياكى ئون نەچچە يىل تاماكا چېكىپمۇ ئۆزىدە ھېچقانداق مەسىلە يوق دەپ قارايدۇ. ئۇنداقتا تاماكا چېكىش سالامەتلىككە زىيانلىق دېگەن قاراش پۇت دەسسەپ تۇرالمامدۇ؟ ئەمەلىيەتتە ئۇنداق ئەمەس، تاماكا چېكىش سالامەتلىككە ھەر جەھەتتىن زىيانلىق بولۇپ، نەپەسلىنىشتىن تاكى قان تومۇر كېسەللىكلىرىگىچە زىچ مۇناسىۋەتلىك بولىدۇ.
1. تاماكا چېكىش ۋە نەپەسلىنىش سىستېمىسى كېسەللىكى
1) بىرلەمچى كاناي ئۆپكە راكى: بۇ دەل دائىم دەيدىغان ئۆپكە راكى بولۇپ، تاماكا چېكىش مەزكۇر كېسەلنى قوزغايدىغان ئاساسلىق سەۋەب ھېسابلىنىدۇ. ئون ئۈلۈش ئۆپكە راكى بىمارى ئىچىدە 8-9 ئۈلۈشى تەشەببۇسكارلىق بىلەن تاماكا چېكىش ۋە ئىككىلەمچى تاماك چېكىش سەۋەبىدىن پەيدا بولغان. تاماكا ئىسىدا كۆپ خىل راك پەيدا قىلغۇچى ماددىلار بولۇپ، تاماكا a دەرىجىلىك راك پەيدا قىلغۇچى ماددا قاتارىغا كىرگەن.
2) سوزۇلما توسۇلۇشچان ئۆپكە راكى: ئەسلىدىنلا سوزۇلما توسۇلۇشچان ئۆپكە راكىغا گىرىپتار بولغۇچىلارغا نىسبەتەن، ئەگەر تاماكا چەكسە ئۇنداقتا ئۇلارنىڭ ئۆلۈش نىسبىتى ئېنىقلا چەكمەيدىغانلارنىڭكىدىن يۇقىرى بولىدۇ ھەمدە تاماكا چېكىش نۆۋەتتە سوزۇلما توسۇلۇشچان ئۆپكە راكىنىڭ بىلىنگەن خەتەرلىك ئامىللىرى ئىچىدىكى ئەڭ مۇھىمى ھېسابلىنىدۇ.
3) پەۋقۇلئاددە كۆرۈلىدىغان ئۆپكە تالالىشىش: كۆپ ساندىكى كىلىنىكىلىق تەتقىقاتلار تاماكا چېكىشنىڭ پەۋقۇلئاددە كۆرۈلىدىغان ئۆپكە تالالىشىش خەۋىپىنى پەيدا قىلىدىغانلىقىنى ئىسپاتلىغان. تاماكا چېكىش مىقدارى بىلەن پەۋقۇلئاددە كۆرۈلىدىغان ئۆپكە تالالىشىشنىڭ قوزغىلىش نىسبىتى زىچ مۇناسىۋەتلىك بولىدىكەن.
2. تاماكا چېكىش بىلەن يۈرەك، مېڭە قان تومۇر كېسەللىكلىرى
1) تاجىسىمان يۈرەك كېسەللىكى، مېڭە سەكتىسى: ئەگەر ھەر كۈنى 10 تال تاماكا چەكسە، ئەرلەرنىڭ يۈرەك قان تومۇر كېسەللىكى سەۋەبىدىن ئۆلۈش نىسبىتى %18، ئاياللارنىڭ %31 ئۆرلەيدىكەن. چۈنكى تاماكا چېكىش قان تومۇر ئېندوتېلىيە ئىقتىدارىنى بۇزغۇنچىلىققا ئۇچرىتىپ، ئارتېرىيەنىڭ بوتقىسىمان قېتىشىشىنى كەلتۈرۈپ چىقىرىپ، قان-تومۇرلار بوشلۇقىنى تارايتىدۇ.
2) يۇقىرى قان بېسىم: بۇ تاماكا چېكىش سەۋەبلىك سىمپاتىك نېرۋا ئاخىرقى ئۇچىنىڭ نورئادرېنالىن قويۇپ بېرىپ، قان بېسىمنى ئۆرلىتىشىنى كۆرسىتىدۇ.
3. تاماكا چېكىش بىلەن ھەزىم قىلىش سىستېمىسى كېسەللىكى
1) قىزىلئۆڭگەچ راكى: تاماكا چەككۈچىلەرنىڭ قىزىلئۆڭگەچ تەڭگىسىمان راكىغا گىرىپتار بولۇش نىسبىتى ئادەتتىكى كىشىلەردىن ئۈچتىن سەككىز ھەسسە يۇقىرى بولىدىكەن.
2) ھەزىم خاراكتېرلىك يارا كېسەللىكى: تاماكا چېكىش يارىنىڭ ئەسلىگە كېلىشىگە تەسىر كۆرسىتىدۇ ھەمدە يارىنىڭ قايتا قوزغىلىشىنى كەلتۈرۈپ چىقىرىدۇ. ھەتتا يارىنىڭ ئەگەشمە كېسەللىكلىرىنىمۇ پەيدا قىلىدۇ.
3) ئاشقازان راكى: تاماكا چېكىشكە زىيادە ھاراق ئىچىش قوشۇلسا ئاشقازان راكىنىڭ خەۋىپىنى تېخىمۇ ئاشۇرۇش ئېھتىماللىقى بولىدۇ.
4. تاماكا چېكىش بىلەن ئىچكى ئاجرالما سىستېمىسى كېسەللىكلىرى
دىيابېت كېسىلى: تاماكا چېكىش 2 تىپلىق دىيابېت كېسىلىنى پەيدا قىلىدۇ ھەمدە دىيابېت كېسەللىك بىمارلىرىدا چوڭ قان تومۇر ۋە مىكرو قان تومۇرلار ئەگەشمە كېسەللىكىنىڭ خەۋپىنى ئاشۇرۇپ، كېسەللىكنىڭ ئاقىۋىتىگە تەسىر كۆرسىتىدۇ.
5. تاماكا چېكىش بىلەن كۆپىيىش ۋە يېتىلىشنىڭ نورمالسىزلىقى
تەتقىقاتلاردا ئاياللار ئەگەر ئۇزاق مەزگىل تاماكا چەكسە ھامىلدار بولۇش نىسبىتىنىڭ تۆۋەن بولىدىغانلىقى ئىسپاتلانغان. ھامىلدارلار تاماكا چەكسە ھامىلىنىڭ ئۆسۈپ يېتىلىشىگە تەسىر كۆرسىتىپ، ئېكتوپىك ھامىلدارلىق، تەبىئىي بويىدىن ئاجراش، يېڭى تۇغۇلغان بوۋاقنىڭ بەدەن ئېغىرلىقى يېنىك بولۇش ۋە بوۋاقلارنىڭ تۇيۇقسىز ئۆلۈپ كېتىشى قاتارلىقلارنى كەلتۈرۈپ چىقىرىدۇ. ئەرلەرگە نىسبەتەن كۆتۈرۈلۈش كۈچىنىڭ توسالغۇغا ئۇچرىشىنى پەيدا قىلىدۇ.
6. تاماكا چېكىش بىلەن باشقا ساغلاملىق مەسىلىلىرى
تاماكا چېكىش چىش ئەتراپى ياللۇغى، كۆز گۆھىرىگە ئاق چۈشۈش كېسەللىكى، ئوپېراتسىيە ئېغىزىنىڭ ئەت ئالماسلىقى ۋە ئوپېراتسىيەدىن كېيىن نەپەسلىنىش سىستېمىسى ئەگەشمە كېسەللىكى، تېرىنىڭ قېرىلىشىشى قاتارلىقلارنى كەلتۈرۈپ چىقىرىدۇ. بۇنىڭدىن سىرت، تاماكا چېكىش يەنە دېۋەڭلىكنىمۇ پەيدا قىلىدۇ.

ئەڭ يېڭى ساغلاملىق مەھسۇلاتلىرى